នៅពេលដែលយើងនិយាយពីទំនាក់ទំនង បន្ទាប់ពីគ្រួសារគឺមិត្តភក្តិនេះហើយ។ អ្នកអាចមានមិត្តភក្តិច្រើន តែបើចំពោះមិត្តជិតស្និតអ្នកប្រហែលជាមានមួយ ឬ អាចគ្មានផង។ មិត្តជិតស្និតឬមិត្តល្អនេះ មិនមែនគ្រាន់តែអ្នកបានជួបនរណាម្នាក់ហើយក៏គិតថាយកម្នាក់នោះជាមិត្តល្អតែម្តងបានទេ។ ជាទូទៅ មិត្តជិតស្និតគឺជាមនុស្សដែលអ្នកចែករំលែកជាមួយ សប្បាយជាមួយគ្នា យំជាមួយគ្នា ឆ្លងកាត់ឧបសគ្គជាមួយគ្នានិងជាអ្នកយល់ចិត្តគ្នាបំផុត។ មិត្តបែបនេះមិនអាចកាត់ថ្លៃបានទេ។ ដោយសារតែបែបនេះហើយទើបបានជាអ្នកត្រូវមើលឲ្យបានដឹងនូវសញ្ញាខ្លះៗដែលអាចបញ្ជាក់ថាម្នាក់នោះគឺជាមនុស្សដែលអ្នកស្វែងរក។
- អ្នកតែងប្រាប់រឿងរ៉ាវគ្នាទៅវិញទៅមកជានិច្ច
នៅពេលដែលអ្នកនៅជាមួយគ្នា វាដូចជាច្បាប់ចែករំលែកមួយយ៉ាងអញ្ជឹង។ អ្នកតែងនិយាយរឿងរ៉ាវផ្សេងៗដែលអ្នកមាន ប្រាប់ទៅគេ ហើយគេក៏និយាយប្រាប់អ្នកវិញ។ ពេលអ្នកមានបញ្ហា គេនេះហើយគឺជាអ្នកដែលអ្នកចង់ប្រាប់និងចង់ឲ្យជួយ។ ហើយដូចអ្វីដែលអ្នកបានគិតដូចនោះដែរ គឺគេនឹងស្តាប់អ្នកហើយផ្តល់ការនែនាំខ្លះៗដល់អ្នក។ អ្នកនិងគេតែងនិយាយរឿងរ៉ាវប្រាប់គ្នា មិនថារឿងល្អឬអាក្រក់ ឬជារឿងកំផ្លែង រឿងសប្បាយ…។
- ពេលពួកអ្នកនៅជាមួយគ្នា ជាពេលដែលល្អបំផុតក្នុងជីវិត
គ្រប់ពេលដែលអ្នកបានអង្គុយហើយនិយាយជាមួយគ្នា ពេលនោះជាពេលសប្បាយនិងល្អបំផុត។ អ្នកនិងគេធ្វើអ្វីក៏ត្រូវគ្នាដែរ ទាំងការសិក្សា ការលេង គឺតែងមានក្តីសុខជានិច្ច។
- គេទទួលយកពីអ្វីដែលអ្នកមាន ហើយតែងគោរពគ្នាទៅវិញទៅមក
មិត្តភក្តិល្អមិនមែនជាមិត្តដែលរើសអើងមិត្តនោះទេ។ មិនថាអ្នកនោះក្រលំបាក មកពីគ្រួសារមិនល្អ រឿងមិនពូកែ មានជាតិសាសន៍ផ្សេងគ្នា មិត្តតែងទទួលយកនិងយល់ពីមិត្តជានិច្ច។ ពួកគេមិនមែនរាប់អានមិត្តដោយសារតែចង់បានផលប្រយោជន៍ពីគេមួយពេលនោះទេ តែគឺជាទំនាក់ទំនងស៊ីជម្រៅ និងអស់មួយជីវិត។ ចំពោះការបញ្ចេញគំនិតក៏ដូចគ្នាដែរ គឺតែងគោរពនិងទទួលយកមកពិចារណាជានិច្ច មិនមើលងាយគ្នាឡើយ។
- អ្នកមានអារម្មណ៍នឹកគ្នានិងចង់និយាយគ្នាពេលដែលមិននៅជាមួយគ្នា
នេះគឺជាការពិត គឺពេលដែលអ្នកមានទំនាក់ទំនងកាន់តែស្និទស្នាល អ្នកកាន់តែមានអារម្មណ៍នៅជាមួយគ្នារហូត។ ពេលដែលមិននៅជាមួយគ្នា អ្នកតែងផ្ញើរសារទៅសួររឿងរ៉ាវផ្សេងៗ ឬក៏ទូរសព្ទនិយាយគ្នាបានបន្តិចក៏អស់ចិត្តដែរ។
- មិត្តល្អជាមិត្តជួយជំរុញយើងឲ្យដល់គោលដៅ
មិត្តល្អឬមិត្តពិតគឺជាមនុស្សដែលជួយអ្នកឲ្យលូតលាស់ឡើង។ ពួកគេតែងជាអ្នកនៅក្បែរយើង ចាំជួយលើកទឹកចិត្តយើង ចាំជួយគាំទ្រយើង និងធ្វើឲ្យយើងមានសង្ឃឹមជានិច្ច។ បើសិនជាគ្មានពួកគេទេ អ្នកប្រហែលជាមិនអាចមានទឹកចិត្តគ្រប់គ្រាន់សម្រាប់តស៊ូក្នុងជីវិតទេ។ អ្នកក៏ដូចគ្នាដែរ គឺជាអ្នកចាំនៅក្បែរនិងជួយគេរហូតដែរ។ គេនឹងមិនច្រនែនឬអន់ចិត្តនៅពេលអ្នកបានទទួលជោគជ័យទេ។ អ្នកនិងគេជួបបញ្ហាជាច្រើន តែអ្នកនិងគេតែងព្យាយាមឆ្លងកាត់រហូតបានទទូលអ្វីដែលខ្លួនចង់បាន។
- តែងនឹកឃើញគ្នាជានិច្ច
មិត្តល្អគឺបែបនេះឯង គឺតែងជាមនុស្សទីមួយដែលអ្នកនឹកឃើញពេលអ្នកទទួលដំណឹងល្អ ឬ ដំណឹងអាក្រក់ណាមួយ។ គេជាមនុស្សទី១ដែលយើងចង់ប្រាប់ និង រកឲ្យឃើញ។ នេះគឺជាលក្ខណៈភ្ជាប់គ្នាយ៉ាងស្អឹតរមួតរបស់មិត្តល្អ។
