គុណសម្បត្តិ និងគុណវិបត្តិនៃការរៀនម្នាក់ឯង និងការរៀនជាក្រុម

មនុស្សយើងមានវិធីសាស្រ្តខុសៗពីគ្នាក្នុងការរៀនសូត្រ អ្នកខ្លះចូលចិត្តរៀនតែម្នាក់ឯង ចំណែកអ្នកខ្លះទៀតចូលចិត្តរៀនជាក្រុម។ ទោះជាយ៉ាងណាក៏ដោយមិនថាអ្នកជ្រើសរើស ឬចូលចិត្តរៀនតាមរយៈវិធីសាស្ត្រណាក៏ដោយសុទ្ធតែមានគុណសម្បត្តិ និងគុណវិបត្តិដូចគ្នាទាំងអស់។ យើងនឹងធ្វើការរៀបរាប់ពីលក្ខណៈសម្បត្តិនៃរបៀបសិក្សាទាំងពីរប្រភេទ។

I. គុណសម្បត្តិនៃការរៀនតែម្នាក់ឯង

ភាគច្រើន មនុស្សដែលជ្រើសរើសរៀនសូត្រតែម្នាក់ឯង ជាប្រភេទមនុស្សដែលពុំសូវចូលចិត្តភាពរញ៉េរញ៉ៃ និងចូលចិត្តនៅស្ងប់ស្ងាត់ ម្យ៉ាងវិញទៀត ពួកគេមិនអាចផ្តោតអារម្មណ៍រៀនឲ្យបានល្អនោះទេនៅពេលរៀនគ្នាច្រើន។ ក៏ប៉ុន្តែពួកគេទទួលបានសារៈប្រយោជន៍យ៉ាងច្រើនពីទង្វើនេះ៖

១. មានភាពឯករាជ្យ៖ អ្នកមានម្ចាស់ការលើខ្លួនឯង មិនចាំបាច់ពឹងពាក់អ្នកដ៏ទៃ ជាពិសេសចង់រៀនពេលណាក៏បាន ដោយមិនចាំបាច់បារម្ភច្រើន។

២. មិនខាតពេលវេលា៖ នៅពេលរៀនជាក្រុម មានគំនិតច្រើន មុននឹងសម្រេចចិត្តអ្វីមួយត្រូវការជជែកគ្នាដែលចំណាយរយៈពេលយូរ ព្រោះមនុស្សម្នាក់ៗតែងមានគំនិតផ្សេងៗពីគ្នា។

៣. អាចផ្តោតអារម្មណ៍បានល្អ៖ នៅពេលដែលស្ងប់ស្ងាត់ មិនមានសំលេងរំខាន អារម្មណ៍យើងមូលឆាប់ចាំមេរៀន ហើយធ្វើលំហាត់ឆាប់ចេះ។

II. គុណវិបត្តិនៃការរៀនតែម្នាក់ឯង

ទោះជាការសិក្សាតែម្នាក់ឯងមានអត្ថប្រយោជន៍យ៉ាងណាក៏ដោយ វានៅតែមានចំណុចអវិជ្ជមានមួយចំនួនដែលមិនអាចចៀសវាងបានទេ។

១. គ្មានអ្នកពិភាក្សា៖ ជាធម្មតាខួរក្បាលច្រើនមានគំនិតច្រើនផ្សេងៗពីគ្នា​ ប្រសិនបើយើងមិនចេះត្រង់ចំណុចណាមួយ យើងក៏អាចពិភាក្សាគ្នាបាន ក៏ប៉ុន្តែនៅពេលដែលយើងរៀនតែម្នាក់ឯង ពេលដែលមានចម្ងល់ត្រង់ចំណុចណាមួយ ពុំមានអ្នកណាអាចឲ្យយើងសួរបាននោះទេ។

២. មិនអាចអភិវឌ្ឍសមត្ថភាពបានលឿន៖ ភ្នំមួយខ្ពស់ក៏នៅទាបជាងស្មៅ យើងមិនអាចនិយាយថាយើងចេះគ្រប់យ៉ាងបានទេ។ នៅពេលដែលយើងរៀនមានដៃគូ ឬជាក្រុម យើងក៏អាចប្រណាំងប្រជែងគ្នា ជជែកគ្នាចុះឡើងដើម្បីស្វែងរកដំណោះស្រាយ ជាហេតុធ្វើឲ្យការអភិវដ្ឍសមត្ថភាពឆាប់រហ័សជាងការរៀនតែឯកឯង។

៣. ស្រ្តេស៖ នៅពេលយើងរៀនមានគ្នា យើងមិនមែនសុទ្ធតែរៀនមួយមុខទេ ក៏ប៉ុន្តែមានទាំងការចំអន់គ្នាចុះឡើង ឬការនិយាយកំប្លែងជាដើម ជាហេតុធ្វើឲ្យស្ថានភាពនៃការសិក្សាគ្មានភាពតានតឹង។ ផ្ទុយទៅវិញបើយើងរៀនម្នាក់​ឯង យើងអាចនឹងអផ្សុក ឬធុញទ្រាន់ជាដើម ពេលខ្លះអាចងងុយគេងលែងមានអារម្មណ៍ចង់រៀនទៀត។

III. គុណសម្បត្តិនៃការសិក្សាជាក្រុម

ប្រសិនបើយើងរៀនមិនសូវចេះ យើងអាចបង្កើតជាក្រុមដើម្បីឲ្យសិស្សដែលពូកែនៅក្នុងថ្នាក់ជួយបង្រៀនយើង ព្រោះការធ្វើបែបនេះអាចជួយឲ្យអ្នករៀនបានច្រើនជាងមុន។​ លើសពីនេះទៅទៀត យើងមានឱកាសសួរសំណួរយ៉ាងច្រើនទៅកាន់មិត្តភក្តិរបស់យើង ដោយហេតុថាពេលខ្លះយើងអាចនឹងមិនសូវហ៊ានសួរទៅកាន់លោកគ្រូរបស់យើង។ ជឿជាក់ថាការរៀនជាក្រុមបែបនេះជារឿយៗ អ្នកនឹងមានការអភិវឌ្ឍជាពុំខាន។

IV. គុណវិបត្តិនៃការសិក្សាជាក្រុម

ការសិក្សាជាក្រុមអាចធ្វើឲ្យសមាជិកក្នុងក្រុមមួយចំនួនមានភាពខ្ជិលច្រអូស។ ឧទាហរណ៍ បើរៀនជាមួយគ្នារាល់ថ្ងៃ ពួកអ្នកដែលខ្សោយ មិនព្យាយាមធ្វើលំហាត់ដោយខ្លួនឯងនៅផ្ទះនោះទេ ប៉ុន្តែចាំមកដល់ពេលរៀនវិញទើបសួរចម្លើយពីអ្នកដ៏ទៃ។ លើសពីនេះទៅទៀត​ការសិក្សាជាក្រុមអាចខ្ជះខ្ជាយពេលវេលា ព្រោះភាគច្រើនមានការនិយាយលេងដោយឥតប្រយោជន៍ច្រើននាពេលសិក្សា។

 

 

 

 

Facebook Comments